Ինչպե՞ս ճիշտ կազմակերպել պատանի մարզիկների սննդակարգը /մաս 1/

• 24 Aug, 2020
• 940 Դիտում (ներ)
• Սկզբնաղբյուր : 123

Այս հոդվածի հիմքում ընկած են աշխարհահռչակ սպորտային դիետոլոգ, մարզիկների ճիշտ սննդակարգի վերաբերյալ մի շարք գրքերի հեղինակ Նենսի Կլարկի վերլուծությունները:

Յուրաքանչյուր տարիքում, անկախ նրանից թե ինչո՞վ է զբաղված երեխան շատ կարևոր է ճիշտ սննդակարգը: Սպորտում հատկապես, պատանի մարզիկների ծնողները պետք է առավել ուշադիր լինեն. ինչո՞վ և ինչպե՞ս պետք է կերակրել նրանց, ի՞նչ կալորիականությամբ և հաճախականությամբ, ի՞նչ է կարելի և ի՞նչ ոչ: Հենց այս հարցերի պատասխաններն էլ կփորձենք տալ այս հոդվածում:

4 հիմնական սկզբունքները, որոնց պետք է հետևեն բոլոր ծնողները

• Առողջ սնունդը պատք է դարձնել կենսական նշանակության խնդիր ողջ ընտաիքի համար: Գործնականում դա առաջին հերթին նշանակում է սննդակարգի պլանավորումը: Այսինքն ի՞նչ և ի՞նչ ձևով պետք է ուտի երեխան, օրվա ո՞ր ժամին, մինչև մարզումները, թե՞ հետո: Այս ամենը պետք է որոշակի ժամանակահատվածի համար նախորոք պլանավորել:
• Խրախուսե՛ք բնական վիտամինների աղբյուրները: Մշտապես սննդակարգում ներառեք մրգեր և բանջարեղեններ: Անգամ ձմռան համար, փորձեք սառցարանի միջոցով պահպանել և օգտագործել միայն բնական վիճակում:
• Սահմանե՛ք սնվելու հստակ ժամեր և հնարավորինս պահեք այն:
• 100%-ով բացառեք երեխաներին տալ հատուկ սպորտային սնունդ և ըմպելիքներ:

Ինչո՞վ կերակրել երեխաներին մրցումներից առաջ, հետո և ընթացքում

Մրցումների ծանրաբեռնված շրջանում ևս կարևոր է պահպանել սնվելու պարբերականությունը: Համոզվե՛ք, որ ապագա չեմպիոններին ապահովել եք հավասարակշռված նախաճաշով: Այդպիսի նախաճաշի պարզ օրինակ կարող է լինել. հացահատիկային ձողիկներ՝ շաքարի ցածր պարունակությամբ, կաթ և բանան: Սակայն պետք չէ մոռանալ, որ մրցաշարային խիտ գրաֆիկը ապահովում է ոչ միայն ֆիզիկական ծանրաբեռնվածություն, այլ նաև նյարդային և հոգեբանական լարվածություն յուրաքանչյուր երեխայի համար: Դա ևս հնարավոր է թուլացնել սննդի միջոցով: Նման դեպքերում, հենց մրցումներից առաջ նրանց տվեք ցածր յուղայնությամբ կաթնային շոկոլադ:

Մրցումներից առաջ խորհուրդ է տրվում օգտագործել թեթև սնունդ՝ հարուստ սպիտակուցներով, օրինակ՝ կաթնաշոռ, յոգուրտ և վարսակի շիլա: Իսկ մրցումների ավարտից հետո սնունդը պետք է ուղղված լինի երեխայի ուժերի և էներգիայի վերականգնմանը: Այստեղ անփոխարինելի են հավի կրծքամիսը, ոչ յուղոտ ձուկը, բանջարեղենային աղցանները և մրգային հյութերը:

Սպիտակուցները պատանի մարզիկների ամենօրյա սննդակարգում: Ինչքա՞ն և ի՞նչ միջոցներով լրացնել:

Աճող երեխաները պարտավոր են սպառել անհրաժեշտ սպիտակուցների օրական նորման: Դա կազմում է 0,5-1 գրամ մարմնի քաշի յուրաքանչյուր կգ-ի համար: Խուսափե՛ք արհեստական միջոցներից, սպիտակուցների անփոխարինելի աղբյուրներն են.

• կաթ
• կաթնաշոռ
• պանիր
• հավի կրծքամիս
• լոբի, սիսեռ, ոսպ
• գետնանուշի յուղ

Շարունակելի…